ගව්පේ (GovPay)

වත්මන් ඩිජිටල් යුගයේ, බොහෝ රාජ්‍ය ආයතන තුළ පවතින සාම්ප්‍රදායික මුදල් ගනුදෙනු හා අතින් ලියන ලද රිසිට්පත් හේතුවෙන් ඇතිවන අකාර්යක්ෂමතා හඳුනාගෙන, LankaPay ආයතනය මෙන්ම තොරතුරු තාක්ෂණ නියෝජිත ආයතනය (ICTA) සහ තාක්ෂණ අමාත්‍යාංශය එක්ව මෙම හිඩැස පිරවීමට රාජ්‍ය ඩිජිටල් ගෙවීම් වේදිකාවක් සැකසීම ආරම්භ කළේය.

2023 අයවැය යෝජනාව මඟින් මෙම ව්‍යාපෘතියට අවශ්‍ය පිටුබලය සැපයීමත් සමඟ, රජයේ සියලුම ගෙවීම් සහ මුදල් එකතුකිරීම් කටයුතු ඉලෙක්ට්‍රොනික ක්‍රමවේදවලට මාරු කිරීම අනාගතයේ අනිවාර්ය වේ. මෙම උපායමාර්ගික පියවර වත්මන් දුෂ්කරතා සඳහා විසදුමක් වන අතර, ඩිජිටල්කරණය සඳහා ඇති ගෝලීය ප්‍රවණතා සමඟ පියවරකට ඉදිරියෙන් සිටීමටත් ඉඩ සලසයි.

මූල්‍ය ආයතන සඳහා, තම මෙහෙයුම් විධිමත් කරගැනීමට හා සේවා වැඩිදියුණු කරගැනීමට මෙය මහඟු අවස්ථාවක් ලබා දේ. ගව්පේ (GovPay) සමග ඒකාබද්ධ වීම හරහා එම ආයතනවලට රජය සමග සිදුකරන ගනුදෙනු, ආරක්ෂිත හා කාර්යක්ෂම ආකාරයකට සිදු කිරීමට ඉඩ සැලසේ. මෙම වෙනසත් සමග මූල්‍ය ආයතනවලට සහ ඔවුන්ගේ ගනුදෙනුකරුවන්ට වැඩි කාර්යක්ෂමතාවක්, විනිවිදභාවයක් හා විශ්වාසනීයත්වයක් ඇතුළු ඉහළ ප්‍රතිලාභ හිමිවනු ඇත.